Espectáculo teatral "Mozas nas redes"

 

O Venres 28 de marzo algúns dos nosos alumnos e alumnas asistiron no IES Gregorio Fernández ao espectáculo teatral “Mozas nas redes”, protagonizado por Estíbaliz Veiga, e que forma parte das actividades organizadas no marco do Plan Proxecta+ “Por 365 días de respecto e igualdade”. Esta obra está orientada á reflexión sobre as novas formas de violencia sexual que acontecen no entorno das novas tecnoloxías da información e da comunicación.

Conclusións da enquisa sobre o grao de coñecemento pola poboación da contorna de Sarria sobre o significado da violencia de xénero e das mudanzas que se deron a este respecto na lexislación española (realizada no marco do Plan Proxecta+ “Por 365 días de respecto e igualdade”).

 

A ONU define na actualidade a violencia de xénero coas seguintes características: “actos ferintes dirixidos contra unha persoa ou grupo de persoas en razón do seu xénero. Ten a súa orixe na desigualdade de xénero, o abuso de poder e a existencia de normas discriminatorias. O termo utilízase principalmente para subliñar o feito de que as diferenzas estruturais de poder baseadas no xénero colocan ás mulleres e nenas en situación de risco fronte a múltiples formas de violencia”.

Nas enquisas elaboradas polo alumnado da Educación Secundaria de Adultos relativas ao coñecemento do significado da violencia de xénero pola poboación da contorna de Sarria, puidemos observar que existe aínda un importante descoñecemento tanto do significado da palabra “xénero” (construción social sobre os roles, comportamento ou características relativas ao feito de ser muller ou home) e súa diferenza co “sexo” (diferenzas biolóxicas entre mulleres e homes), como de que a violencia cara as mulleres pode ir moito máis aló do maltrato físico.

Así, se ben como recollemos na nosa exposición a “violencia de xénero” aludiría ás agresións físicas ou psicolóxicas emanadas do histórico desprezo da condición feminina ou da crenza en que o corpo das mulleres ou a súa sexualidade son unha propiedade dos varóns, desgraciadamente aínda existe hoxe en día unha percepción de que as medidas lexislativas elaboradas nas últimas décadas contra esta lacra (feitas despois de máis de 5.000 de Historia na que estas careceron dos dereitos humanos máis esenciais), discriminan aos homes ou os culpabilizan en exceso.

En conxunto (sen ter en conta as variables que se analizaron como a idade ou o nivel educativo) só un 40% dos homes e un 45% das mulleres coñecen o significado aproximado da violencia de xénero, e só un 40% dos homes e un 45% das mulleres citan algunhas das mudanzas que se deron nas leis nos últimos anos.

Conmemoramos o Día internacional da Muller

 

Os integrantes do Plan Proxecta+ “Por 365 días de respecto e igualdade” tinguen de violeta o vestíbulo do IES Gregorio Fernández para conmemorar o 8 de Marzo, baixo o lema “Xunt@s pola igualdade”.

Todas somos bruxas!

 

Ao longo da historia a figura da meiga ou bruxa estivo asociada con aquelas mulleres libres que transgredían os roles tradicionais de xénero, e que non se conformaban con representar o papel de submisas, abnegadas e obedientes que a sociedade lles asignaba.

A asociación entre esta figura e o pecado ou a malignidade consolidaríase entre os séculos XVI e XVIII, e daría lugar a unha dramática persecución e represión contra as mulleres (centenares delas foron torturadas ou queimadas vivas ante a acusación de bruxería). As últimas execucións de bruxas son de 1782 (coa condena a morte da Ana Göldi), sete anos antes de que estalara a Revolución Francesa que marcaría o inicio da nosa era. Como exemplo gráfico desta aberración recollemos as palabras de Mona Chollet da súa obra: Bruxas. A forza invencible das mulleres (2020):

“Un obstáculo fundamental no camiño a atopar unha explicación reside no feito de que as acusacións contra as bruxas foran tan grotescas e incribles que non poidan ser comparadas con ningún outro motivo de crime. Como dar conta do feito de que durante máis de dous séculos en distintos países europeos, centos e centos de mulleres foron xulgadas, torturadas, queimadas vivas ou colgadas, acusadas de ter vendido o seu corpo e alma ao Demo e, por medios máxicos (...) causado a morte dos seus veciños, destruíndo gandos e cultivos, levantando tormentas e realizando unha cantidade maior de abominacións?

Desde o Plan Proxecta+ “Por 365 días de respecto e igualdade” queremos facer unha homenaxe a todas estas mulleres, e pensamos que non é desacertado afirmar que todas somos bruxas!