Exposición didáctica sobre a violencia de xénero na Historia elaborada para o Plan Proxexta+ "Por 365 días de respecto e igualdade" 2024-2025

 

25 de Novembro. Día Internacional da Eliminación da Violencia contra as Mulleres

 

O IES Gregorio Fernández levou a cabo diversas actividades para conmemorar o 25 de Novembro, Día Internacional da Eliminación da Violencia contra a Muller. Entre elas, no marco do Plan Proxecta+ titulado “Por 365 días de respecto e igualdade”, elaborouse unha exposición didáctica sobre o tratamento histórico da violencia de xénero desde o punto de vista político ou xurídico, e un concurso de carteis (que contou cunha alta participación entre o alumnado de todo o centro) cun slogan alusivo ao lema “A educación é a mellor arma contra a violencia de xénero.” Na organización destas actividades participaron membros/as dos departamentos de Administración, Electricidade e Electrónica, FOL, Francés, Instalación e Mantemento, Lingua Castelá e Literatura, Lingua Galega, Música e Xeografía e Historia.

Así mesmo, tamén dentro deste Plan Proxecta+, o alumnado da Educación Secundaria de Adultos do IES Gregorio Fernández de Sarria elaborou un pequeno estudo sobre o grao de coñecemento por parte dos homes e mulleres da contorna de Sarria sobre o significado da “violencia de xénero” e sobre as mudanzas lexislativas que se deron a este respecto na Idade Contemporánea.

Concurso de deseño de carteis en conmemoración do 25 de novembro

 

Traballos do concurso "bolboretas pola igualdade"

 

Concurso de deseño "bolboretas pola igualdade"

 

Concurso de carteis para o 25 de Novembro, Día Internacional da Loita contra a Violencia de Xénero

 

Palestra da profesora da facultade de Veterinaria Ruth Rodríguez Bermúdez: "As mulleres nas ciencias"

O sistema educativo xoga un papel esencial na erradicación da discriminación de xénero. Desde o punto de vista dos estudos universitarios, a matriculación das primeiras mulleres na universidade supuxo unha importante ferramenta de loita contra todas aquelas voces que tradicionalmente cuestionaban a capacidade intelectual destas.

Porén, en Galicia até 1896 non se matricula por primeira vez unha alumna na Universidade de Santiago (na facultade de Farmacia), que remataría a súa licenciatura en 1901. Nos anos seguintes o número de alumnas universitarias iría incrementándose moi lentamente, até supoñer un 8% do total do alumnado segundo o Anuario de 1934 (no contexto da II República).

Así mesmo, a instauración da II República (1931-1936) daría lugar a un importante progreso noutros niveis educativos, reducíndose significativamente o número de analfabetas (que pasou dun 69% a comezos do século XX a un 35% a finais do período republicano).

De igual xeito, no camiño cara a destrución dos roles tradicionais de xénero, cómpre destacar a importancia da reforma educativa elaborada durante o período republicano, coa implantación por primeira vez na historia do Estado español dun ensino completamente laico e da liberdade de Cátedra, así como da coeducación dos nenos e nenas equiparándose os seus itinerarios formativos.

Non obstante, todas estas conquistas veríanse interrompidas co estalido en 1936 da Guerra Civil e coa posterior instauración da ditadura franquista. Así, ademais da dura represión que afectou a numerosos docentes e a reconstrución dos contidos educativos para a súa adaptación aos principios da ditadura, eliminaríase a coeducación entre nenos e nenas ou a equidade nos itinerarios formativos.

Nos anos 70, nun contexto de apertura ao exterior e de importantes mudanzas sociais, promulgouse a Lei Villar Palasí coa creación da Educación Xeral Básica e do ensino obrigatorio ata os 14 años para ambos sexos. Tras a EXB accedíase ao Bacharelato Unificado e Polivalente (BUP) e superado este ao denominado Curso de Orientación Universitaria (COU), como paso previo á universidade.

Esta reforma educativa supuxo un importante salto cuantitativo e cualitativo na formación das mulleres, e a partir dos anos 90 a porcentaxe de alumnas universitarios superaba aos alumnos nas tres universidades públicas galegas. Así e todo, a perpetuación dos roles tradicionais de xénero daría lugar a que a presenza das mulleres nas carreiras científicas ou técnicas seguise a ser moi minoritaria, tendencia que comeza a racharse nos últimos anos.