Matematizando a Historia: as barreiras infinitas impostas ás mulleres

 

No IES Gregorio Fernández inauguramos unha exposición sobre as barreiras infinitas impostas ás mulleres galegas ao longo do tempo (e sobre a discriminación de xénero que segue a existir na actualidade), titulada: “Matematizando a Historia”.

A través destes paneis, tentamos expresar en linguaxe matemática os importantes obstáculos cos que se atoparon as mulleres ao longo da historia. Así mesmo, presentamos parte dos resultados da indagación desenvolvida polo noso alumnado arredor das dificultades que aínda existen para conciliar a vida laboral e familiar, así como da percepción que teñen os traballadores e traballadoras sobre a equidade entre mulleres e homes nos seus respectivos ámbitos de traballo.

Defendendo a diversidade!

 

Os/as participantes no Plan Proxecta “Donas de si” 2025/26 subliñamos a necesidade de fomentar entre o alumnado os valores de tolerancia e respecto cara toda a diversidade afectivo-sexual. Con este obxectivo, nalgúns cursos estamos a traballar cos materiais pedagóxicos editados pola Consellería de Política Social e Igualdade titulados “Decálogo pola igualdade LGBTI”.

Estes materiais están orientados a contribuír a que os institutos sexan un espazo inclusivo, no que todas as persoas se sintan seguras e respectadas. Así mesmo, búscase promover unha educación baseada nos dereitos humanos e na igualdade, contribuíndo á eliminación de estereotipos, prexuízos e actitudes discriminatorias.

Entre outras cuestións, tratamos aspectos como o afrontamento de conflitos nas relacións humanas, o papel das familias -que tal como se indica nestas unidades didácticas “son o primeiro espazo de aprendizaxe das crianzas, no que comezan a desenvolver a súa identidade e a establecer os valores que as guiarán ao longo da súa vida”- ou como abordar a diversidade desde a transversalidade.

Outra das liñas de actuación deste proxecto consistirá na integración transversal destes contidos nalgunhas materias. Deste xeito, promoverase a inclusión de referentes históricos do colectivo LGBTI, contribuíndo a visibilizar a diversidade ao longo do tempo e en diferentes contextos.

Seguimos a traballar no fomento da igualdade de xénero!

 

No marco do Plan Proxecta+ “Donas de si” 2025-26, traballamos tamén no camiño da reconstrución da historia das mulleres con actividades que parten da bibliografía máis recente neste campo, como son as obras Feminismos. A historia cóntana as vencedoras (2019), de Anna R. Figueiredo; Os homes explícanme cousas (2019), de Rebecca Solnit  e Bruxas. A forza invencible das mulleres, de Mona Chollet. Todas elas foron enviadas polas organizadoras deste programa educativo.

Do contido destes libros, destacamos catro pequenos textos que inspiran á reflexión sobre a gran dimensión dos agravios que afectaron ás mulleres na historia en todos os ámbitos sociais, así como sobre a importancia da mobilización feminista na cimentación dos chanzos cara a igualdade de xénero:

 

“A palabra bruxa fora a peor das marcas da infamia, a imputación mentireira que supuxera a tortura e a morte de ducias de miles de mulleres. Na conciencia colectiva, as cazas de bruxas que se produciron en Europa, principalmente nos séculos XVI e XVII, ocupan un lugar estraño. Os procesos de bruxería fundamentábanse en acusacións extravagantes (...) que parecen arrastralas cara á esfera da irrealidade, arrincándoas do seu enraizamento histórico.”

           Chollet, Mona. Bruxas. A forza invencible das mulleres. A Coruña: Hércules Ediciones, 2020, p.16.

 

“Na actualidade estamos afeitas a recibir información sobre todo tipo de eleccións, sexan de ámbitos tan abstractos e amplos como o Parlamento europeo ou tan concretos como á delegada da clase. En ningún momento das nosas vidas se nos pasa pola cabeza que as campañas electorais, que os programas electorais, vaian dirixidos a un único grupo de persoas”.

   Figueiredo, Anna R. Feminismos. A historia cóntana as vencedoras. Vigo: Galaxia, 2019, p. 39.

 

“O movemento feminista de segunda onda queda indiscutiblemente marcado pola procura do sufraxio das mulleres. Atendendo á definición que nos dá a RAG, sufraxio é o procedemento mediante o cal unha persoa expresa a súa vontade, en especial sobre unha cuestión política, e xeralmente por medio do voto”.

               Figueiredo, Anna R. Feminismos. A historia cóntana as vencedoras. Vigo: Galaxia, 2019, p. 39.

 

“As revolucións están feitas na súa meirande, de ideas (..). Os cambios prácticos prodúcense tras as mudanzas no corazón e na mentalidade. Ás veces os cambios legais, políticos, económicos e ambientais veñen tras eses trocos, pero non sempre, pois importa saber onde reside o poder”.

           Solnit, Rebecca. Os homes explícanme cousas. A Coruña: Hércules de Ediciones, 2019, p. 129.

 

Tamén estamos a realizar algunhas das actividades vinculadas ás unidades didácticas: “María Wonenburger: Unha científica adiantada ao seu tempo”, elaborada por María José Souto Salorio e Ana Dorotea Tarrío Tobar, e a realizada por Montse Pena Presas sobre a obra Feminismos. A historia cóntana as vencedoras de Anna Figueiredo. Neste sentido, a partir da figura de María Wonenburguer e doutras mulleres destacadas na historia, reflexionamos sobre como as deficiencias na educación feminina e os atrancos cos que se atopaban estas para participar tanto nas redes de investigación científica e técnica como noutros espazos culturais como os literarios e artísticos, deron lugar á perda dun potencial de creación infinito imposible de restaurar.

De igual xeito, subliñamos a necesidade de dar visibilidade ao feito de que, malia que existiron estas grandes barreiras, as mulleres tiveron unha participación social activa no devir da historia e nos seus principais acontecementos. A este respecto, como se observa nesta última unidade didáctica, a mobilización feminista sería fundamental na consecución das transformacións lexislativas que se deron na Idade Contemporánea, así como na paulatina mudanza das mentalidades.

Os versos dalgúns dos nosos escritores e escritoras escóitanse en voz alta na celebración do Día da Poesía.

O pasado mércores 18 de marzo celebramos o Día da Poesía, que en Sarria está dedicado ao noso querido compañeiro Eduardo Rey. Todos os centros escolares da comarca participaron neste evento, e cada un deles organizou a lectura ou representación de poemas de diversos autores galegos, cun leitmotiv común: “O monte”.

Entre os autores, non faltou o poeta máis representativo desta comarca: Fiz Vergara Vilariño, así como a poeta e feminista Rosalía de Castro.

Así mesmo, dúas grandes figuras da literatura e da música galega contemporánea estiveron presentes neste acto: Xurxo Souto (como presentador) e Francisco Castro, que musicou e puxo voz a algúns dos poemas máis emblemáticos da nosa cultura.

Hoxe, 8 de Marzo, aprendemos un pouco máis da traxectoria de Mercedes Vázquez Saavedra

 

Hoxe, 8 de marzo, aprendemos un pouco máis dos traballos de Mercedes Vázquez Saavedra, a sarriá que inmortaliza coa súa cámara a esencia do noso patrimonio inmaterial.

O día 5 marzo gozamos no noso instituto da presenza de Mercedes Vázquez Saavedra, unha muller de gran relevancia na documentación do patrimonio inmaterial da nosa terra, constituíndo os seus traballos un importante legado histórico para a cultura galega. Foi entrevistada na radio do noso instituto, Radio Bolboreta, por algúns dos nos nosos alumnos e alumnas.

Mercedes Vázquez Saavedra, nacida en Sarria no ano 1949, é unha fotógrafa, escritora, etnógrafa e documentalista. Ademais de traballar como profesora e na Administración Pública, Mercedes foi unha emprendedora pioneira nunha época na que as mulleres tiñan aínda moitos atrancos no ámbito laboral. Ocuparíase da parte creativa dunha empresa familiar, que compaxinaría coa súa paixón pola fotografía e a escritura.

Dentro destes campos, centrou especialmente o seu interese na fotografía etnográfica, e a través da súa cámara, soubo captar non só imaxes, senón tamén memorias, identidades e formas de vida en risco de desaparecer. O seu traballo constitúe un valioso testemuño visual do patrimonio cultural, convertendo a fotografía nunha ferramenta de investigación, conservación e dignificación das comunidades retratadas.

Como fotógrafa especializouse no retrato das mulleres da raia entre Galicia, Castela e León e Portugal, coñecidas como arraianas. Así mesmo, son moi afamados os seus traballos documentando e impulsando os entroidos e a conservación da etnografía local vinculada a estas festividades.

Entre as súas publicacións atopamos os libros “Guía da Ribeira Sacra”; “Pobra de Brollón”; “María Mariño; do mar de Noia á Serra do Courel” ou “Ramón Piñeiro do val de Láncara a Compostela”. Tamén recibiu diversos recoñecementos públicos, como foi o caso do seu nomeamento como Arraiana Maior en 2021 ou o Premio Mestra da Memoria, outorgado pola Asociación de Escritoras e Escritores en Lingua Galega (AELG), en 2023.

Na actualidade, está a levarse unha exposición súa sobre fotografías femininas, titulada “Mulleres”, por todos os recunchos da xeografía da nosa terra. Aquí vos deixamos unha mostra dos seus traballos.

Foi un pracer para o IES Gregorio Fernández contar coa presenza desta gran figura da nosa cultura! Aquí deixamos algunhas das súas fermosas fotografías.

 

Educarse para construír sociedades máis humanas, solidarias e igualitarias!

 

Onte o IES Gregorio Fernández recibiu a visita da fotógrafa sarriá Mercedes Vázquez Saavedra, co obxecto de inaugurar unha nova instalación de vinilos na outra escaleira do edificio principal do centro, titulándose esta escada: “Amar as letras. Amar os números. Amar a vida”. As letras que titulan a escaleira son da autoría do escritor e músico Francisco Castro e foron creadas orixinalmente para este proxecto.

A través dos seus chanzos e coincidindo co 50 aniversario do centro, o IES Gregorio Fernández  pretende subliñar a importancia que ten a educación no enriquecemento persoal e social, e motivar así o noso alumnado para que valore a aprendizaxe como un proceso imprescindible para formarse como persoas que contribúan á creación de sociedades tolerantes, solidarias, igualitarias e humanas.

Os lemas foron escollidos entre as palabras achegadas por integrantes de toda a comunidade educativa. Estes son os seguintes: Máis educación, menos conflitos; Aprender a nosa lingua fainos máis libres; A educación, escaleira para acadar os teus soños; A cultura é o fusil dos sensatos; Só a educación abre as portas da igualdade; Aprender é medrar libre; A educación é o piar dunha sociedade; Fórmate, entenderás a vida; A educación, un feixe de luz!; e O coñecemento é poder!.

Así mesmo, Mercedes Vázquez inaugurou varios paneis que promoven a igualdade de xénero, titulados “Feminismo para escépticos” e elaborados para o Plan Proxecta+ “Donas de si” en colaboración co equipo de Dinamización da Lingua Galega. Estes paneis están ilustrados con algunhas imaxes desta fotógrafa, que ten unha longa traxectoria inmortalizando a mulleres galegas ou portuguesas (especialemnte as “arraianas”), constituíndo os seus traballos un importante legado para a cultura galega.

Estes paneis foron instalados no vestíbulo do edificio principal. Entre outras cuestións, recollen os resultados dunha indagación elaborada polo noso alumnado arredor da percepción que existe na contorna de Sarria sobre o significado do “feminismo” e sobre a importancia deste movemento. Entre as conclusións deste estudo, observamos que só un 40% das enquisadas e un 30% dos enquisados defínense como feministas. Así mesmo, un 50% das mulleres e un 70% dos homes opina que o feminismo discrimina os varóns, e nun 40% das respostas femininas e nun 65% das masculinas afírmase que na actualidade son as mulleres as que teñen máis dereitos.

Á par disto, explícase nestes paneis que o termo feminismo deriva do latín femĭna (‘muller’) e, combinado co sufixo -ismo, fai referencia a unha doutrina ou movemento social orientado a acadar a plena equidade de xénero. Así, a súa orixe non está vinculada á crenza nunha suposta superioridade feminina nin a un menosprezo cara aos homes ou á natureza da masculinidade. A orixe desta palabra remóntase ao século XIX, cando foi empregada por aquelas persoas que, de maneira valente e moi arriscada —expostas a duros castigos físicos, penais, ou morais—iniciaron loitas públicas contra a exclusión das mulleres dos novos conceptos de “democracia” ou “igualdade ante a lei” que enunciaban os nacentes sistemas liberais.

Estas reivindicacións feministas da Idade Contemporánea, sumadas ás loitas de outros homes e mulleres nas distintas etapas da Historia, fixeron posible as conquistas legais que temos hoxe en día, castigándose penalmente a discriminación ou a violencia contra as mulleres en calquera espazo público ou privado.

Finalmente, Mercedes Vázquez foi entrevistada na radio escolar do centro, Radio Bolboreta, como unha actividade conxunta entre o Plan Proxecta+ "Donas de si" e o Programa Innova-lab (Mat-lab) no que tamén particicipamos. Este é un proxecto interdisciplinar no que se conxugan as Matemáticas, a Historia, as Ciencias Sociais e o mundo empresarial, co obxecto de abordar diversas perspectivas arredor do concepto de infinito.

Neste entrevista, o alumnado participante fixo ficapé na figura de Mercedes Vázquez Saavedra como muller empresaria pioneira en Sarria, cun negocio téxtil que abría as súas portas hai 50 anos e que constitiu un referente neste sector en toda a comarca.

https://open.spotify.com/episode/6S2ZLdKaalbQHtTs7vGqb6?si=xQWvpL6ETH6JkSE8nnenCg

https://sarriaxa.com/news/o-ies-gregorio-fernandez-inaugura-unha-escaleira-educativa-e-paneis-de-igualdade-da-man-de-mercedes-vazquez/117459/

Rosa-lía, de novo damos a chapa coa nosa poeta máis afamada!

 

O Departamento de Lingua Galega (participante no Plan Proxecta+ “Donas de si”) realizou, co obxecto de conmemorar o día dedicado a Rosalía de Castro, unhas orixinais chapas que xogan co nome desta escritora. Parabéns polo traballo realizado!

Conmemoramos o Día de Rosalía de Castro, muller adiantada ao seu tempo!

 

No marco do Plan Proxecta+ “Donas de si”, en colaboración co Equipo de Dinamiación da Lingua Galega, convocamos o concurso titulado “Tunea a Rosalía” (co gallo da celebración do día dedicado a esta autora, o 23 de febreiro), no que o alumnado elaborou diferentes ilustracións ou representacións do rostro de Rosalía empregando unha técnica de libre elección.

Hoxe instalamos no vestíbulo do edificio 100 unha mostra destes traballos, cos que homenaxeamos a unha muller clave na loita feminista, así como varios carteis que anuncian a próxima conmemoración do 8 de marzo (para o que xa temos preparadas diversas sorpresas).

Queremos lembrar que esta figura fundamental da cultura da nosa terra rachou, tanto na súa vida como na súa obra, co paradigma de muller “ideal” submisa e abnegada propio da súa época. Nun contexto histórico no que as mulleres estaban relegadas a un papel de submisión á vontade dos varóns en todos os ámbitos públicos e privados, Rosalía participou activamente nos círculos intelectuais e políticos, intervindo nos debates culturais e sociais do seu tempo.

Na súa traxectoria vital defendeu a independencia das mulleres e que estas expresasen libremente as súas inquedanzas. Así mesmo, cuestionou os estereotipos de xénero tradicionais e denunciou as inxustizas que afectaban á nosa terra. É así un exemplo de coraxe e valentía, que hoxe en día continúa a inspirar as novas xeracións na defensa da emancipación das mulleres e na loita contra as aldraxes e inxustizas que padecen.

Nas dúas guerras mundiais as mulleres tamén construíron a historia!

 

As dúas guerras mundiais do século XX (1914-1928 e 1939-1945), conforman dous dos episodios máis dramáticos da Idade Contemporánea, que deixaron tras de si millóns de vítimas mortais e terribles secuelas físicas e psicolóxicas.

Porén, segue a ser necesaria unha reconstrución da súa historia, xa que o relato tradicional sobre estes sucesos esqueceu o papel neles das mulleres. Así, estas participaron  tanto nos combates armados como noutros ámbitos sociais ou económicos de gran relevancia. Neste sentido, elas tamén estiveron nos frontes de batalla (sufriron na súa propia carne os atroces padecementos asociados ás guerra) e ocuparon, ante a marcha dos varóns, os postos máis decisivos na produción industrial ou agrícola.

Desde o Ámbito Social da ESPA queremos homenaxear a estas mulleres e, co noso costume de achegar o museo á aula, o alumnado puido tocar e mesmo probarse un casco usado na II Guerra Mundial.

Sementar educación constrúe sociedades máis xustas!

Participa con nós e crea un lema que motive a aprender! Que fomente a creación de sociedades máis xustas e igualitarias. As túas palabras engalanarán a nosa escada!

Concurso de deseño: "Tunea a Rosalía de Castro"

 

Boas festas a todas/os!

 

Desde o Equipo de Dinamización da Lingua Galega do IES Gregorio Fernández felicitamos as festas en todas as linguas do noso alumnado incluíndo, por suposto, o idioma galego.

Tamén, aprobeitamos para lembrarnos novamente da figura dunha das primeiras aventureiras galegas: Exeria. Muller políglota e de gran cultura, no século IV realizaría unha longa viaxe a Terra Santa, que sería recollida no seu diario titulado Peregrinatio.

Lembramos a gran discriminación laboral das traballadoras galegas nos séculos XIX e XX e a importancia do Movemento Obreiro

 

O movemento obreiro foi nos século XIX e XX un puntal clave na paulatina consecución dos dereitos que se foron recoñecendo ao longo da Idade Contemporánea aos traballadores e traballadoras. Durante a Revolución Industrial, as condicións de vida do proletariado eran extremadamente duras: longuísimas xornadas de traballo (era común que alcanzasen as 14 horas diarias), salarios ínfimos, falta de hixiene e de proteción ante os riscos laborais, despido libre, ausencia do dereito de asociación ou explotación infantil.

Ante esta situación, algúns obreiros e obreiras emprenderon valentes e arduas protestas, cuxa suma sería fundamental nas mudanzas lexislativas que se foron sucedendo até a actualidade, aínda que cunha evolución moi lenta ante os atrancos da alta burguesía.

No caso das mulleres, a situación sería aínda máis dramática, xa que ademais de padecer tamén unhas condicións de traballo infrahumanas (e facerse cargo en exclusiva das tarefas domésticas e do coidado dos fillos e fillas), estaban fortemente discriminadas con respecto aos varóns, sendo común que cobrasen 1/3 ou a metade do salario que se lle pagaba aos seus compañeiros, que sufrisen todo tipo de abusos nos espazos laborais, a apertura de inxustos expedientes ante calquera denuncia das aldraxes que padecían ou o despido das traballadoras encintas.

En Galicia, no mes de decembro de 1857 produciríase unha das primeiras mobilización protagonizadas polas obreiras, coas protestas das cigarreiras da Real Fábrica de Tabacos da Coruña. Esta fábrica chegou a empregar arredor de 4.000 mulleres, sometidas a condicións laborais especialmente duras, caracterizadas por salarios moi baixos, longas xornadas de traballo e unha elevada precariedade. O desencadeante desta protesta, de natureza ludita, foi a incorporación de novas máquinas de picadura que diminuían de maneira significativa a demanda de man de obra. Este episodio, xunto con outras mobilizacións femininas, sería posteriormente retratado por Emilia Pardo Bazán na súa novela La Tribuna (1883).

No Estado español, as primeiras leis que prohibiron os agravios de xénero no ámbito laboral non foron promulgadas até a II República (1931-1936), co recoñecemento pola Constitución de 1931, por primeira vez na historia, da interdición da discriminación por razón de sexo e do dereito das mulleres a acceder a calquera tipo de ocupación.

Porén, as mentalidades sociais terían unha evolución aínda máis lenta, e os medios de comunicación deste período fanse eco do menosprezo cara a forza de traballo das mulleres e da normalización da figura do home como sustentador principal e prioritario da economía doméstica (considerándose o traballo das mulleres como algo sempre auxiliar e complementario en casos de extrema necesidade).

No Ámbito Social da ESPA traballamos con este documento publicado en El Progreso en decembro de 1931, elaborado polo recoñecido médico galego Enrique Calvar e recollido nunha investigación realizada polo noso alumnado de adultos no curso 2021-22.

“El avance del feminismo -en todos los aspectos que se le considere- es en nuestro entender un daño que se le hace a la humanidad, daño que a la larga se traducirá por trastornos tan intensos (…) La mujer no sólo se diferencia del hombre por su aparato genital (…) realmente todo el organismo femenino está supeditado a la función de la reproducción (…) La psiquis femenina- por más que se pretenda- no podrá nunca parangonarse con la del varón, hasta el punto de que aquellas mujeres que intelectualmente alcanzaron elevadas tallas, deben este privilegio a lo que en sus estructuras llevan de hombre (…) La mujer pura -la feminidad por excelencia- es un tipo de mujer que no soporta sin graves trastornos un trabajo intelectual, enojoso, ni un obrerismo pesado y que responde enseguida con alteraciones orgánicas.”^[1]

 

Señorans Calvar, Enrique. “Temas médicos. Obrerismo femenino”, El Progreso, núm. 348. 2 dec. 1931, p. 1.

---

[1] Señorans Calvar, Enrique. “Temas médicos. Obrerismo femenino”, El Progreso, núm. 348. 2 dec. 1931, p. 1.

Carmen Sobrado, gañadora do concurso de carteis contra a violencia de xénero!

 

A nosa alumna do Módulo 1 da ESPA, Carmen Sobrado, gañou o concurso de deseño de carteis en denuncia da violencia de xénero. Ademais de facer un fermoso traballo en tea e cartón, Carmen é unha incansable muller traballadora e unha activa feminista.

Parabéns en nome de todo o IES Gregorio Fernández!!

A Revolución francesa esqueceu á metade feminina da poboación

 

A Revolución Francesa (1789) é o acontecemento máis importante dos últimos séculos, xa que supón o punto de partida do derrubo efectivo do Antigo Réxime, no que o poder estaba monopolizado polos estamentos privilexiados: a Igrexa e da nobreza, e o pobo chan carecía dos dereitos humanos máis básicos. Porén, nos textos fundamentais que deron cobertura ideolóxica a este proceso, como foi o caso da Declaración de Dereitos do Home e do Cidadán, asentados sobre os principios da liberdade e da igualdade como bases do novo estado liberal, deixouse fóra á metade feminina da poboación.

Esta discriminación no asentamento dos chanzos da Idade Contemporánea, crearía un perigoso antecedente de cara a instauración futura dos sistemas liberais noutros estados, xa que era posible enunciar como principios básicos da cidadanía a liberdade e a igualdade á par que as mulleres permanecían toda a súa vida baixo a tutela dos varóns. Perpetuaríase así a idea tradicional de que estas eran inferiores aos homes de maneira connatural, tanto desde o punto de vista biolóxico e intelectual como moral, e que a súa liberdade de actuación era perigosa para a estabilidade social.

Na aula do Ámbito Social do Módulo 3 da ESPA traballamos con dous documentos que exemplifican os argumentaban que aportaban os revolucionarios franceses para xustificar esta discriminación, escritos polos deputados Amarat e Talleyrand e recollidos na obra de Paule Marie Duhet: Las mujeres y la revolución, 1789-1794 (1974).

 

“O home é forte, robusto, dotado de gran enerxía, audacia e valor (...). Cales son as características peculiares que definen á muller? Os costumes e a natureza mesma asignáronlle as súas funcións: comezar pola educación dos homes, preparar a mente e o corazón dos nenos ás virtudes públicas, encamiñalos desde a súa máis tenra infancia cara o ben (…). Estas son as funcións que lles competen, ademais das súas labores caseiras (…). Deben ser autorizadas en París as concentracións de mulleres agrupadas baixo a etiqueta de Sociedade Popular? (…). A súa solución debe vir precedida por dúas de tipo máis xeral, e que son as seguintes: 1. Poden as mulleres exercer dereitos políticos e tomar parte activa nas tarefas de goberno? 2. Poden elas deliberar, congregadas en asociacións políticas ou en Sociedades Populares? Con respecto a eses dous interrogantes, o comité optou por unha negativa.”

 

“Non resulta evidente que a súa fráxil constitución física, a súa predisposición por unha vida sosegada, as numerosas obrigas da maternidade, sepáraas constantemente dos hábitos rudos, dos traballos pesados, e as invita a dedicarse as ocupacións sosegadas e ás labores do fogar? Como non darse conta de que o principio conservador das sociedades, que instituíu a harmonía na división de poderes, foi expresado e como revelado pola Natureza, cando distribuíu de tal sorte aos sexos unhas obrigas (...).”

Así mesmo, afondamos na figura dunha das primeiras feministas da Idade Contemporánea, Olympe de Gouges (1748-1793) que, entre outras cousas, escribiu a Declaración de Dereitos da Muller e da Cidadá (1791) como crítica da exclusión das mulleres nas novas conquistas xurídicas. Desgraciadamente, ao igual que outras mulleres que se desviaron dos roles tradicionais de xénero, foi condenada á guillotina en 1793.

Máis actividades en loita contra a violencia de xénero!

 

Nos útimos días realizamos do IES Gregorio Fernández diversas actividades vinculadas á loita contra a violencia de xénero, arredor do Plan Proxecta+ “Donas de Si” ou do Programa para o Impulso de Centros Referentes da modalidade de Proxectos de Inclusión Educativa (PIE), nos que tamén contamos coa activa participación  do Concello de Sarria.

A este respecto, a proposta deste último, o noso alumnado de 1º e 2º da ESO asistiu á representación teatral “Expectativa vs realidade”, do grupo Trémola Teatro. Igualmente, impartiuse unha charla sobre a violencia de xénero a cargo de Noelia Míguez (para o alumnado de 3º e 4º da ESO) e o encontro-debate titulado “Hai saída grazas a ti”, dirixido ao alumnado de 1º e 2º de Bacharelato. 

Moitas grazas pola boa acollida que tiveron na prensa as nosas actividades contra a violencia de xénero e en defensa da completa eliminación da discriminación das mulleres!

 

https://www.lavozdegalicia.es/noticia/lugo/sarria/2025/11/13/instituto-sarria-pisa-forte-pola-igualdade/00031763056276603889360.htm?fbclid=IwY2xjawOEUo1leHRuA2FlbQIxMABicmlkETBuSVhXZ2RzNmwwMFVUVXMxc3J0YwZhcHBfaWQQMjIyMDM5MTc4ODIwMDg5MgABHoLaPXjnKDisXVZxAN_ipULtcedkp2Ij4VVzaGNr2GLCz_Xwzd_vSSxhx7WF_aem_b3HeGu8b-rHNcw0J0WGexA

https://sarriaxa.com/news/o-ies-gregorio-fernandez-analiza-a-violencia-de-xenero-nunha-charla-impartida-por-maxistrados-galegos/109344/

Estamos moi contentos/as no noso instituto coa repercusión que tiveron as nosas actividades en loita contra a violencia de xénero e contra a discriminación das mulleres.

Moitísmas grazas a El Progreso, La Voz de Galicia e XarriaXa!